સમય

નદીનુ વ્હેણ છે સમય
પળોનુ રેણ છે સમય


જુવે બધું - કહે કશુંક -
નજર છે નેણ છે સમય


હિસાબ છે અરસપરસ -
-કે લેણદેણ છે સમય


નિયમ થયાં - કહેવતો
અર્થાત કહેણ છે સમય


મરોડદાર ને અકળ -
કલમની ફેણ છે સમય



-કવિ રાવલ.

નિર્વિકલ્પે

હોય તૃષ્ણા બીજને પણ ફૂંટવાની
તો જ ઘટનાઓ ઘટે છે ઊગવાની..

રોજ રાત્રે એ ગણે છે તારલાઓ -
છે ઘડી કૈ વીજ ચમકારો થવાની ?

માંગવું છે આજ જો તારો ખરે તો
એટલે બસ રાત આખ્ખી જાગવાની

એ જ મારી સાધના છે જોઈ લે તું
ત્યાગ દ્વારા હું ઘણુંયે પામવાની

ઝિંદગી શતરંજ છે, પ્યાદા રમે છે..
નિર્વિકલ્પે ચાલ કોઈ ચાલવાની....


-કવિ રાવલ...

મખમલી

સ્પર્શ હા એનો ભલેને મખમલી છે
લાગણીઓ તો'ય પણ આ જોખમી છે


વાદળોથી બનેલી એ પરી છે
એટલે તો આંખમાં એની નમી છે


ઝિન્દગીની સૌ અદાઓ આગવી છે
આપની દીવાનગી પણ લાઝમી છે


એક એ આભાસ ઘેરો ને ગહેરો
છે નશો જેની અસર આ કાયમી છે.


છે વળી એ આપની આગોશ જેવી
એટલે તો એ મને હરદમ ગમી છે..



-કવિ રાવલ